आज एकान्‍तात हळवी वेदना | Aaj Ekantat Halavi

आज एकान्‍तात हळवी वेदना गंधीत झाली
अंगप्रत्यंगात हलके चांदण्यांची हाक आली

आर्जवी डोळ्यांत माझे गीत रेंगाळून होते
त्याच डोळी हळद ओली रात्र शृंगारात न्हाली

ती दिवा विझवून होती, मी पहाटे जागलो
ठेवुनी ओळी दिव्यांच्या ती पुढे मार्गस्थ झाली

एकदा हिरव्या ऋतूचा बहर स्वप्‍नांतून आला
हरवल्या दिवसास माझ्या साक्ष कवितेची मिळाली

गीत	–	अनिल कांबळे
संगीत	–	आनंद मोडक
स्वर	–	पद्मजा फेणाणी-जोगळेकर
गीत प्रकार	–	भावगीत