यमुनाकाठी ताजमहाल | Yamunakathi Taj Mahal

बादशहाच्या अमर प्रीतिचे मंदिर एक विशाल
यमुनाकाठी ताजमहाल

मूर्तिमंत झोपली प्रीत अन्‌ मृत्यूचे ओढून पांघरूण
जीवन कसले महाकाव्य ते गाईल जग चिरकाल
यमुनाकाठी ताजमहाल

नि:शब्द शांती अवतीभवती, हिरे जडविले थडग्यावरती
एकच पणती पावित्र्याची जळते येथ खुशाल
यमुनाकाठी ताजमहाल

हळूच या रसिकांनो येथे, नका वाजवू पाऊलांते
दिव्यदृष्टिला होईल तुमच्या मंगल साक्षात्कार
यमुनाकाठी ताजमहाल

गीत	–	गजानन वाटवे
गीत प्रकार	–	भावगीत